SBASHK kritikon mungesën e dialogut me MASHT-in: Pakënaqësitë në rritje, paqartësi për fillimin e vitit të ri shkollor
Tre dhjetori i vitit të kaluar ka qenë hera e fundit kur Sindikata e Bashkuar e Arsimit të Kosovës (SBASHK) është ulur në tryezë me Ministrinë e Arsimit, Shkencës dhe Teknologjisë (MASHT). Kjo mungesë e dialogut mbetet një nga shqetësimet kryesore të sindikatës, sipas nënkryetares Vjollca Shala.
“Kërkesat tona tashmë janë të njohura. Njëra prej tyre është dialogu social – gjë që realisht nuk ekziston mes nesh dhe MASHT-it. Po ashtu, çështja e kontratës kolektive mbetet pezull. Draftin e kemi dorëzuar, por nuk ka pasur asnjë përgjigje. Takimi i fundit ishte me 3 dhjetor,“ deklaroi Shala për RTV21.
Nga ana tjetër, Ministria e Arsimit nuk ka dhënë asnjë reagim lidhur me këto akuza të SBASHK-ut.
Pakënaqësitë e sindikatës, përveç deklaratave publike, shpesh janë shoqëruar me veprime sindikale, përfshirë grevat. Mirëpo, ish-zëvendësministri i Arsimit, Dukagjin Pupovci, ka shprehur shqetësimin se pasojat e këtyre grevave po i bartin kryesisht nxënësit, të cilët po përballen me vështirësi në arritjen e rezultateve të kënaqshme në testet ndërkombëtare.
“Kjo është e vërtetë, sidomos duke pasur parasysh gjendjen në sistemin arsimor dhe rezultatet jo të kënaqshme të testeve ndërkombëtare. Grevat përkthehen në humbje të mësimit për nxënësit. Por, përvoja e së kaluarës ka treguar se edhe vetë punonjësit e arsimit pësojnë, sidomos kur krijohet një narrativ që dëmton funksionin fisnik të profesionit të tyre”, u shpreh Pupovci për RTV21.
Aktualisht nuk ka një vendim zyrtar nga SBASHK nëse do të nisin vitin e ri shkollor 2025/2026 me greva apo veprime të tjera sindikale, por sindikata thotë se pakënaqësitë janë të thella dhe të vazhdueshme.
